लागू औषध कारोबार गरेको पुष्टि भएपछि दक्षिण अस्ट्रेलिया राज्यका पूर्व लिवरल नेता डेभिड स्पियर्सलाई राज्यको एक अदालतले सजाय सुनाएको छ ।

अदालतले स्पियर्सलाई नौ सय डलर जरिवाना तोक्नुका साथै ३७.५ घण्टा सामुदायिक सेवा गर्नुपर्ने आदेश गत बिहीबार दिएको छ ।

स्पियर्सलाई प्रहरीले गत सेप्टेम्बर महिनामा उनले लागू औषध सेवन गरेको भिडियो सार्वजनिक भएपछि पक्रिएर अनुसन्धान शुरू गरेको थियो जसलाई उनले ‘डिपफेक’ भिडियो भनेर शुरूमा अस्वीकार गरेका थिए । यद्यपि त्यसलगत्तै उनले आफूले झुठो बोलेको बताएपछि पदबाट राजीनामा दिएका थिए ।

गत महिना उनले आफूले दुई जना व्यक्तिलाई लागू औषध दिएको स्वीकार गरेका थिए । यसअघि उनका वकिलले अदालतसमक्ष उनलाई विदेश भ्रमण गर्न रोक नलागोस् भनेर उनको अपराधलाई रेकर्ड नगर्न अनुरोध गरेका थिए । यद्यपि न्याधीशले यसलाई गम्भिर अपराधको संज्ञा गर्दै अस्वीकार गरेको समाचार संस्था एबिसीले जनाएको छ ।

डेभिड स्पियर्स सन् २०२२ मा दक्षिण अस्ट्रेलिया राज्यको लागि लिवरल पार्टीका नेता नियुक्त भएका थिए भने उनले १० वर्ष सांसदका रूपमा काम गरिसकेका थिए ।